Jon Elia Ghazal: Raqs KareiN

Please set the character encoding of your browsers to UTF8
————————————————————-

آ کہ جہانِ بے خبراں میں بے خبرانہ رقص کریں

خیرہ سرانہ شور مچائیں خیرہ سرانہ رقص کریں

فن تو حسابِ تنہائی ہے شرط بھلا کس شے کی ہے

یعنی اُٹھیں اور بے خلخال و طبل و ترانہ رقص کریں

داد سے جب مطلب ہی نہیں تو عذر بھلا کس بات کا ہے

ہم بھی بزمِ بے بصراں میں بے بصرانہ رقص کریں

ہم پہ ہنر کے قدر شناساں ناز کناں ہیں یعنی ہم

سازِ شکستِ دل کی صدا پر عشوہ گرانہ رقص کریں

تختئہ گُل ہو عذر انگیزِ آبلہ پائی اپنے لئیے

ہاں سرِ نشتر ہا ذکرانہ تا بہ کرانہ رقص کریں

مرضی مولا از ہمہ اولیٰ شوق ہمارا مولا ہے

ہم وہ نہیں جو بزم طرب میں پیشہ ورانہ رقص کریں

بر سرِ شور و برسرِ شورش بر سرِ شبخوں بر سرِ خوں

چل کہ حصار فتنہ گراں میں فتنہ گرانہ رقص کریں

کوئی نہیں جو آ ٹکرائے سب چوراہے خالی ہیں

چل کہ سرِ بازارِ تباہی بے خطرانہ رقص کریں

بعدِ ہنر آموزی ہم کو تھا پندِ استاد کہ ہم

با ہنرانہ رقص میں آئیں بے ہنرانہ ر قص کریں

اپنے بدن پر اپنے خوں میں غیر کا خوں بھی شامل ہو

بار گہہِ پرویز میں چل کر تیشہ ورانہ رقص کریں

Leave a Reply